இலங்கை மத்திய வங்கியின் நாணயக் கொள்கைச் சபையானது 2024 செத்தெம்பர் 26ஆம் நாளன்று நடைபெற்ற அதன் கூட்டத்தில் மத்திய வங்கியின் துணைநில் வைப்பு வசதி வீதத்தினையும் துணைநில் கடன்வழங்கல் வசதி வீதத்தினையும் முறையே 8.25 சதவீதம் மற்றும் 9.25 சதவீதம் கொண்ட அவற்றின் தற்போதைய மட்டங்களில் பேணுவதற்குத் தீர்மானித்துள்ளது. 

2024 ஓகத்தில் கொள்வனவு முகாமையாளர் சுட்டெண்கள்,  தயாரிப்பு மற்றும் பணிகள் நடவடிக்கைகள் ஆகிய இரண்டிலும் விரிவடைதல்களை எடுத்துக்காட்டுகின்றன.

தயாரிப்பிற்கான இலங்கைக் கொள்வனவு முகாமையாளர் சுட்டெண் (கொ.மு.சு – தயாரிப்பு), 2024 ஓகத்தில் 55.5 சுட்டெண் பெறுமதியினைப் பதிவுசெய்தது. இது முன்னைய மாதத்துடன் ஒப்பிடுகையில் மெதுவான வீதத்தில் காணப்படுகின்ற போதிலும் தயாரிப்பு நடவடிக்கைகளில் தொடர்ச்சியான விரிவடைதலை எடுத்துக்காட்டுகின்றது. தொழில்நிலை தவிர,  அனைத்து துணைச் சுட்டெண்களும் ஓகத்தில் நடுநிலையான எல்லைக்கு மேல் இருந்தன.