நடைமுறைக் கணக்கானது 2025இன் இதுவரையான காலப்பகுதியில் தொடர்ச்சியாக மாதாந்த மிகைகளைப் பதிவுசெய்ததுடன், வெளிநாட்டுத் துறையின் செயலாற்றம் 2025 யூலையில் மேலும் வலுவடைந்தது. 

2025 யூலை இறுதியுடன் முடிவடைந்த ஏழு மாத காலப்பகுதியில், வணிகப் பொருட்கள் மற்றும் பணிகள் உள்ளடங்கலாக, மொத்த ஏற்றுமதிகள் ஐ.அ.டொலர் 12.0 பில்லியனாக மேம்பட்டு, 6.7 சதவீதம் கொண்ட ஆண்டிற்கு ஆண்டு வளர்ச்சியொன்றைப் பதிவுசெய்தன. வணிகப் பொருட்களின் ஏற்றுமதிகள் இதுவரை இல்லாத உயர்ந்தளவான ஏற்றுமதிகளைப் பதிவுசெய்து, ஐ.அ.டொலர் 1.3 பில்லியனாக விளங்கின. ஏற்றுமதியின் வளர்ச்சி இறக்குமதியை விடவும் விஞ்சி இருந்தமையினால், வணிகப்பொருள் வர்த்தகப் பற்றாக்குறை 2024 யூலையுடன் ஒப்பிடுகையில் 2025 யூலையில் சுருக்கமடைந்தது. 

கொழும்பு மாவட்டத்திற்கான காணி விலைமதிப்பீட்டுக் குறிகாட்டியானது 2024இன் முதலாம் அரையாண்டுடன் ஒப்பிடுகையில், 2025இன் முதலாம் அரையாண்டில் 11.4 சதவீதத்தினால் அதிகரித்தது. காணி விலைமதிப்பீட்டுக் குறிகாட்டியின் அனைத்துத் துணைக் குறிகாட்டிகளும் அதாவது, வதிவிட, வர்த்தக மற்றும் கைத்தொழில் காணி விலைமதிப்பீட்டுக் குறிகாட்டிகள் இவ்வதிகரிப்பிற்குப் பங்களித்து, முறையே 14.4 சதவீதம், 11.5 சதவீதம் மற்றும் 8.4 சதவீதம் கொண்ட ஆண்டு அதிகரிப்புகளைப் பதிவுசெய்தன. அதேவேளை, அரையாண்டு அடிப்படையில் காணி விலைமதிப்பீட்டுக் குறிகாட்டியும் அதன் துணைக் குறிகாட்டிகளும் 2024இன் இரண்டாம் அரையாண்டு காலப்பகுதியில் பதிவாகிய பெறுமதிகளுடன் ஒப்பிடுகையில் 2025இன் முதலாம் அரையாண்டு காலப்பகுதியில் உயர்ந்தளவான வேகத்தில் அதிகரித்தன. இது தொடர்பில், அதிகூடிய அதிகரிப்பு வதிவிடக் காணி விலைமதிப்பீட்டுக் குறிகாட்டியில் பதிவுசெய்யப்பட்டதுடன் அதனைத் தொடர்ந்து வர்த்தக காணி விலைமதிப்பீட்டுக் குறிகாட்டிகள் காணப்பட்டன.