2024ஆம் ஆண்டின் 26ஆம் இலக்க வங்கிகளினால் வழங்கப்பட்ட கடன்களை அறவிடுதல் (விசேட ஏற்பாடுகள்) (திருத்தச்) சட்டத்தின் மீதான தொழிற்பாட்டுக் குழுவின் கூட்டத்தின்போது சிறிலங்கா பாங்க்ஸ் அசோசியேசன் (கறன்டி) லிமிடெட்டினால் இணங்கப்பட்டவாறு, உயிர்த்த ஞாயிறு தாக்குதல், கொவிட்-19 உலகளாவிய நோய்த்தொற்று மற்றும் அண்மைக் காலத்தில் நிலவிய விதிவிலக்கான பேரண்டப் பொருளாதார நிலைமைகள் என்பன காரணமாக பாதிக்கப்பட்ட சிறிய மற்றும் நடுத்தர தொழில் முயற்சிகளுக்கு வழங்கப்படவுள்ள நிவாரண வழிமுறைகளை எடுத்துக்காட்டுக்கின்ற சுற்றறிக்கை அறிக்கையொன்றினை இலங்கை மத்திய வங்கி 2024.12.19 அன்று உரிமம்பெற்ற வங்கிகளுக்கு விடுத்திருக்கிறது.

நிதியியல் முறைமை உறுதிப்பாட்டிற்கு இடர்நேர்வுகளை தோற்றுவிக்கின்ற தடைசெய்யப்பட்ட திட்டங்களின் எச்சரிக்கைமிக்க அதிகரிப்பினை கட்டுப்படுத்துவதற்கும் அத்தகைய திட்டங்களிலிருந்து பொதுமக்களைப் பாதுகாப்பதற்கும் இலங்கை மத்திய வங்கி முனைப்பான வழிமுறைகளை எடுத்து வருகின்றது. தனிநபர்கள் அல்லது நிறுவனங்கள், வங்கித்தொழில் சட்டத்தின் 83(இ) (1) ஆம் பிரிவின் ஏற்பாடுகளை மீறியுள்ளனரா அல்லது மீறுவதற்கு சாத்தியம் காணப்படுகின்றதா என்பதனை தீர்மானிப்பதற்கு வங்கித்தொழில் சட்டத்தின் 83(இ) (3)ஆம் பிரிவின் கீழ் விசாரணைகளை நடாத்துவதை இம்முயற்சிகள் உள்ளடக்குகின்றன.