2011ஆம் ஆண்டின் 42ஆம் இலக்க நிதித்தொழில் சட்டத்தின் 37(3) ஆம் பிரிவின் நியதிகளின் பிரகாரம், 2022 திசெம்பர் 28ஆம் திகதி தொடக்கம் நடைமுறைக்குவரும் வகையில் சுவர்ணமஹால் பினான்ஸ்சியல் சேர்விஸஸ் பிஎல்சிக்கு வழங்கப்பட்ட நிதித்தொழில் உரிமத்தினை இரத்துச்செய்வதற்கு இலங்கை மத்திய வங்கியின் நாணயச் சபை தீர்மானித்துள்ளது. அதற்கமை, நிதித்தொழில் சட்டத்தின் கீழ் நிதித்தொழிலில் ஈடுபடுவதற்கு 2022 திசெம்பர் 28 தொடக்கம் நடைமுறைக்குவரும் வகையில் சுவர்ணமஹால் பினான்ஸ்சியல் சேர்விஸஸ் பிஎல்சி அனுமதிக்கப்படாது.

தயாரிப்பு மற்றும் பணிகள் நடவடிக்கைகள் இரண்டுக்குமான கொள்வனவு முகாமையாளர் சுட்டெண்கள் 2022 நவெம்பரில் சுருக்கமடைந்து காணப்பட்டன.

தயாரிப்பு நடவடிக்கைகளில் மாதத்திற்கு மாதம் அடிப்படையில் பின்னடைவினை எடுத்துக்காட்டி, தயாரிப்பு கொள்வனவு முகாமையாளர் சுட்டெண் 2022 நவெம்பரில் 42.1 கொண்ட சுட்டெண் பெறுமதியினைப் பதிவுசெய்தது. நிரம்பலர் விநியோக நேரத்திற்கானவை தவிர, அனைத்து துணைச் சுட்டெண்களிலும் அவதானிக்கப்பட்ட குறைவடைந்த செயலாற்றம் இப்பின்னடைவிற்கு பங்களித்திருந்தது.   

பணிகள் கொ.மு.சுட்டெண்ணானது ஒத்தோபரின் 47.9 சுட்டெண் பெறுமதியிலிருந்து உயர்வடைந்து 2022 நவெம்பரில் 49.0 பெறுமதியினைப் பதிவுசெய்தது, இருந்தும் நடுநிலையான அடிப்படை மட்டத்திற்கு சற்றுக் கீழேயே காணப்பட்டது.  புதிய வியாபாரங்கள், தொழில் நடவடிக்கைகள் மற்றும் நடவடிக்கைக்கான எதிர்பார்க்கைகள் என்பவற்றில் அவதானிக்கப்பட்ட மேம்பாடுகளுடன் பணிகள் நடவடிக்கைகளில் வீழ்ச்சி வீதம் தளர்வடைந்தது.  எவ்வாறாயினும், தொழில்நிலை மற்றும் நிலுவையிலுள்ள பணிகள் மாதகாலப்பகுதியில் வீழ்ச்சியடைந்தன.