" A Step by Step Guide to Doing Business in Sri Lanka " ප්‍රකාශනයේ අටවන සංස්කරණය පොදු මහජන පරිශීලනය සඳහා ඉංග්‍රීසි මාධ්‍යයෙන් දැන් නිකුත් කර ඇති අතර ‘ව්‍යාපාරයක් ආරම්භ කිරීම’, ‘ව්‍යාපාරයක් තුළ’ සහ ‘වෙනත් ක්‍රියාකාරකම්’ යන ප්‍රධාන පරිච්ඡේද තුන යටතේ වර්ගීකරණය කර ඇති මෙම ප්‍රකාශනය ව්‍යාපාරික ප්‍රජාව, විදේශීය ආයෝජකයින්, ව්‍යවසායකත්ව හැකියාවෙන් යුත් පුද්ගලයින් සහ ආයෝජන ප්‍රවර්ධන ආයතන සඳහා ප්‍රයෝජනවත් වන තොරතුරු වලින් සමන්විත වේ. එක් එක් මාතෘකාව යටතේ අදාළ ආයතන, ලේඛන අවශ්‍යතා, නියාමන නිෂ්කාශන සහ අදාළ වියදම් පිළිබඳව සවිස්තරාත්මක තොරතුරු අන්තර්ගත වේ. තවද, මෙම ප්‍රකාශනය සඳහා 2018 මැද භාගය වනතෙක් අදාළ ආයතන වලින් ලබා ගත් සංශෝධන ඇතුළත් කොට තිබේ.

මෙම ප්‍රකාශනය සෙන්ට්‍රල් පොයින්ට් ගොඩනැගිල්ල (චැතැම් වීදිය, කොළඹ 01), බැංකු විදු පියෙස ( අංක 58, ශ්‍රී ජයවර්ධනපුර මාවත, රාජගිරිය ) සහ ශ්‍රී ලංකා මහ බැංකුවේ මාතර, මාතලේ, නුවරඑළිය, කිලිනොච්චිය, ත්‍රිකුණාමලය සහ අනුරාධපුරයෙහි පිහිටි ප්‍රාදේශීය කාර්යාලවල බෙදාහැරීම් කවුළු වලින් මිල දී ගත හැකිය. තවද මෙහි විද්‍යුත් පිටපත ශ්‍රී ලංකා මහ බැංකුවේ නිල වෙබ් අඩවියෙන් (http://www.cbsl.gov.lk) ලබා ගත හැක.

ශ්‍රී ලංකා රජය, 2007 වසරේ සිට ජාත්‍යන්තර ස්වෛරීත්ව බැඳුම්කර නිකුත් කරයි. නිදහස ලැබීමේ සිට මේ දක්වා ශ්‍රී ලංකා රජය විසින් ජාත්‍යන්තර ස්වෛරීත්ව බැඳුම්කර ද ඇතුලත් වන්නා වූ තම ණය වගකීම් කළට වේලාවට සේවාකරණය කිරීම මගින් නිකැළැල් වාර්තාවක් පවත්වාගෙන ඇත.

2014 වසරේ ජනවාරි හා අප්‍රේල් යන මාසවලදී නිකුත් කරන ලද පිළිවෙළින් ඇ.එ.ජ. ඩොලර් මිලියන 1,000 ක් සහ 500 ක් වූ ජාත්‍යන්තර ස්වෛරීත්ව බැඳුම්කර, 2019 ජනවාරි හා අප්‍රේල් යන මාසවලදී කල් පිරීමට නියමිතය. 2019 වසරේදී කල් පිරෙන ජාත්‍යන්තර ස්වෛරීත්ව බැඳුම්කර ගෙවීම් සිදු කිරීම සඳහා අවශ්‍ය අරමුදල් උපාය මාර්ගික නොවන වත්කම් විකිණීමෙන් සහ කාලීන ඒකාබද්ධ ණය පහසුකම් ලබාගැනීම මගින් ශ්‍රී ලංකා රජය විසින් මේ වන විට සම්පාදනය කරගෙන ඇත.

ජාත්‍යන්තර වෙළෙදපොලට ප්‍රවේශවීම සදහා යෝග්‍යතම අවස්ථාව තවදුරටත් ගවේෂණය කරන අතර ජාත්‍යන්තර වෙළෙඳපොළ මත පදනම් වූ විදේශ අරමුදල් මූලාශ්‍ර විවිධාංගීකරණය කිරීම සඳහා සාම්ප්‍රදායික යුරෝඩොලර් ජාත්‍යන්තර ස්වෛරීත්ව බැදුම්කර වෙළදපලට පරිබාහිර වෙනත් අන්තර්ජාතික ප්‍රාග්ධන වෙළෙඳපොළ වෙත ප්‍රවේශ වීම සඳහා අවශ්‍ය ක්‍රියාමාර්ග ශ්‍රී ලංකා රජය හා ශ්‍රි ලංකා මහ බැංකුව විසින් දැනටමත් ගෙන ඇත.