ඉදිකිරීම් අංශයෙහි ශ්‍රී ලංකා ගැනුම් කළමනාකරුවන්ගේ දර්ශකය 2024 අගෝස්තු මාසය තුළ දී දර්ශකාංක 51.4 ක අගයක් වාර්තා කරමින් එයට පෙර මාසයේ පැවති සැලකිය යුතු ඉහළ මට්ටමේ සිට අඩු වේගයකින් වුවද ඉහළ ගියේය. තවද, පෙර මාසයට සාපේක්ෂව ඉදිකිරීම් කර්මාන්තයේ මෙහෙයුම් බොහෝ දුරට නොවෙනස්ව පැවති බව පෙන්නුම් කරමින් අනෙකුත් බොහෝ දර්ශක ද කඩඉම් මට්ටම ආසන්නයේ පැවතුණි.

ශ්‍රී ලංකා මහ බැංකුවේ මුදල් ප්‍රතිපත්ති මණ්ඩලය 2024 සැප්තැම්බර් මස 26 වැනි දින පැවති රැස්වීමේ දී මහ බැංකුවේ නිත්‍ය තැන්පතු පහසුකම් අනුපාතිකය (SDFR) සහ නිත්‍ය ණය පහසුකම් අනුපාතිකය (SLFR), පිළිවෙළින්, සියයට 8.25 සහ සියයට 9.25 ලෙස දැනට පවතින මට්ටමේ පවත්වාගෙන යෑමට තීරණය කළේය.