ජනලේඛන හා සංඛ්‍යාලේඛන දෙපාර්තමේන්තුව විසින් වාර්ෂිකව ප්‍රකාශයට පත් කරනු ලබන දළ දේශීය නිෂ්පාදිතය (ද.දේ.නි.), ශ්‍රී ලංකා මහ බැංකුවේ සංඛ්‍යාන දෙපාර්තමේන්තුව විසින් පළාත් මට්ටමින් සකස් කරගත් දර්ශක යොදා ගනිමින් පළාත් අනුව බෙදා වෙන් කර පළාත් දළ දේශීය නිෂ්පාදිතය(ප.ද.දේ.නි.) ඇස්තමේන්තු කර ඇති අතර බස්නාහිර පළාත අඛණ්ඩව රටේ නාමික දළ දේශීය නිෂ්පාදිතයට ඉහළම දායකත්වය දක්වනු ලැබීය. කෙසේවුවත්, මෑතකාලීනව දක්නට ලැබුණු, බස්නාහිර පළාත ද.දේ.නි. ට දක්වන දායකත්වය අඩුවීමේ ප්‍රවණතාවය 2017 වසරේදී ද දක්නට ලැබුණු අතර එමගින් පළාත්බද විෂමතාවය අඩුවීම පිළිබිඹු කෙරේ. නාමික ද.දේ. නි. ට දෙවන හා තෙවන ඉහළම දායකත්වය මධ්‍යම හා වයඹ පළාත් විසින් ලබා දෙන ලදී.
2017 වසරේ දී නැගෙනහිර, වයඹ සහ ඌව පළාත්, පළාත් ද.දේ.නි. සඳහා දක්වන දායකත්වය ඉහළ ගිය අතර බස්නාහිර, දකුණු, උතුරු මැද සහ සබරගමුව පළාත්වල දායකත්වය පහළ ගියේය. මධ්‍යම සහ උතුරු පළාත්වල දායකත්වය නොවෙනස්ව පැවතුණි.